Францияның ЛГБТ белсенділері Гааганың Халықаралық сотын Шешенстандағы гейлерге қысым жасауды тергеуге шақырды. ЛГБТ қозғалысының үш белсендісі атынан Шешенстан басшысы Рамзан Қадыровқа қарсы шағым берілді.
Шағым мәтінінде Қадыровты “геноцид логисті” деп атаған. Арызданушылар Шешенстан басшысының гейлерге арналған құпия түрме ұйымдастыруға қатысы бар деп есептейді.
Шешенстандағы гейлерді жаппай ұстап, оларды азаптап өлтіргені жөнінде “Новая газета” басылымы жазған. Республика билігі журналистерді жала жапты деп айыптады, редакцияға түрлі қысымдар болып жатыр.
Ресейдің Адам құқықтары жөніндегі уәкілі Татьяна Москалькова 16 мамырда “Новоя газета” келтірген нақты адамдардың қуғын көргені жөніндегі дәйектерді тергеу комитетіне жібергенін мәлімдеді. Осының алдында журналистер тергеу ісі қимылсыз отыр деп шағымданған.