Астанада Мемлекет басшысы Нұрсұлтан Назарбаевтың қатысуымен үкіметтің кеңейтілген отырысы өтіп жатыр. Жиынды премьер-министр Бақытжан Сағынтаев ашты.
Бұл туралы Tengrinews.kz хабарлады.
“Ұлттық банк өткен жылы өте сауатты жұмыс істеді. Қазір мен банк жұмысын заңдық тұрғыда күшейту туралы тапсырма бердім. Осындай құқық беру керек. Ұлттық банктің ісіне араласу еліміздің қаржылық жүйесі ісіне араласу деп саналып, ондайлар өз жазасын алуы керек. Мен Ұлттық банк тәртіп орнатқан сайын банк төрағасына шабуыл үдеп бара жатқанын байқап отырмын”, – деді Нұрсұлтан Назарбаев.
Елбасы Ұлттық банктің қазіргі басшысын қос қолдап қолдайтынын мәлімдеді.
“Мұны істеп отырған осы залдағы акционерлер мен демеушілер. Ешкімнен қорықпа, ешкімнен”, – деді Ұлттық банктің басшысына қарата айтқан сөзінде Назарбаев.
“Бұған газеттер, журналистер, оның қожайындары кінәлі. Тәртіпті орнатуға кедергі келтірген ол қожайындарға қатысты шара қолданылатын болады”, – деді Президент.
“Егер тағы біреу тиісіп жатса, маған аты-жөнін айт”, – деді Нұрсұлтан Назарбаев.
Айта кетелік, алдында ҚР Ұлттық банкі Данияр Ақышевтың тұтқындалуы туралы алып-қашпа сөзге қатысты құқыққорғау органына шағымданатынын мәлімдеген.