Бұрын сотты болған азамат жазасын өтеген соң оның сотталғандығы туралы мәлімет базадан алынып тасталады.
Бүгін Өңірлік коммуникациялар қызметінде өткен брифингте Қазақстан Республикасы Бас прокуратурасының Атырау облысы бойынша басқарма басшысының орынбасары Жәнібек Семғалиев мұның себебін түсіндірді, – деп хабарлайды ҚазАқпарат.
– Кейбір мекемелер азаматтарды жұмысқа қабылдау кезінде олардан сотталмағандығы туралы анықтама әкелуді талап етеді. Бұл бұрын сотталған азаматтардың наразылығын тудырып келген еді. Азаматтардың құқын қорғау мақсатында осы мәселе ҚР Бас прокуратурасында қаралды. «Мемлекеттік қызметтер туралы» ҚР Заңының 13-бабына сәйкес, стандартты түрде көрсетілетін мемлекеттік қызмет тізімдемесіне қызметті енгізген күннен бастап 3 айдың ішінде бекітіледі, – деді басқарма басшысының орынбасары Жәнібек Семғалиев.
Енді, 2017 жылдың ІІ-тоқсанынан бастап бұрын қылмыстық жауапкершілікке тартылған, соттылықтары жойылған немесе алынып тасталған азаматтар анықтаманы «Соттылығы жоқ» деген белгімен ала алады.