Осынау маңызды мәселелерді шешу үшін 2015 жылдың соңында ҚР Денсаулық сақтау және әлеуметтік даму министрлігі Медициналық және фармацевтикалық қызметті бақылау комитетінің ұйытқысымен Ұлттық дәрілік формулярды жасау қолға алынды. Ал 2016 жылдың мамыр айында қазақстандық ұлттық формуляр (ҚҰФ) пилотты режимде іске қосылып, 2016-2019 жылдарға арналған «Денсаулық» мемлекеттік бағдарламасы аясында белгіленген басты міндеттердің бірі өз шешімін тапты. Осылайша, Тәуелсіз мемлекеттер достастығында Қазақстан мұндай ақпараттық ресурсты алғашқы болып іске қосты.
Формулярдың бас редакторы Талғат Нұрғожиннің айтуынша, Қазақстандық ұлттық дәрілік формулярды құрастырудағы басты мақсат – медицина саласының мамандары мен қалың жұртшылықты дәрілік заттар туралы өзекті, толыққанды, шынайы ақпаратпен қамтамасыз ету. ҚҰФ-ты жасақтау барысында фармокотерапия саласындағы озық әлемдік тәжірибе қолданылды. Қазақстанның ұлттық формулярын әзірлеуге отандық мамандармен қатар, Дүниежүзілік Банк сарапшылары, Еуропа мен Жаңа Зеландиядан келген халықаралық кеңесшілер, тәжірибелі клиникалық фармакологтар, сонымен қатар әлемде үздік болып саналатын британдық ұлттық дәрілік формулярдың бұрынғы директоры Дункан Энрайт қатысты.
Оның айтуынша, ҚҰФ үш міндетті шешуге мүмкіндік береді. Біріншіден, оған тек тиімділігі дәлелденген, сапалы дәрі-дәрмектер енген. Екіншіден, онда дәрі-дәрмектің шекті бағалары көрсетілгендіктен, азаматтар белгілі бір дәрі түрін сауда маркасы арқылы емес, патенттелмеген атауына қарай, өзіне қолжетімді бағамен таңдай алады. Әрі мекеме үшін де сатып алу барысында қаражатты тиімді пайдалануға жол ашады. Бұған қоса, медицина саласының мамандарына әрдайым білімін жетілдіріп, жаңа мағлұматтар алып отыруға мүмкіндік береді.
Дункан Энрайт Қазақстанның ұлттық дәрілік формуляры тек Орталық Азия аймағындағы ғана емес, әлемдегі озық жобалардың бірі екеніне сенімді. Ақпараттық ресурс мамандар мен қарапайым азаматтарды дәрі туралы шынайы мәліметтермен қамтамасыз етіп қана қоймай, сонымен қатар тек тиімділігі дәлелденген дәрілерді қолдануға ықпал етеді. Ал бұл өз кезегінде науқастарға көрсетілетін медициналық қызмет сапасын көтеруге тікелей әсер ететіні сөзсіз.
«Еліміздегі медициналық мекемелер өз ұйымдарының формулярын жасақтау барысында осы ұлттық формулярды негізге алулары тиіс. Бұл мекемеге бюджетті ұтымды жоспарлап, тиімді дәрілерді сатып алуға мүмкіндік береді» дейді формулярдың бас редакторы Нұрлан Ерғожин.
Ұлттық формулярды қалың жұртшылық та www.knf.kz сайты арқылы орыс және қазақ тілдерінде онлайн-режимде қолдана алады. ҚҰФ Дүниежүзілік денсаулық сақтау ұйымы мақұлдаған жүйе бойынша құрылған. Препарат туралы ең қажетті ақпараттың бәрі бір бетте жинақталған. Ал қажет болған жағдайда, сілтемені ашып, кеңірек мағлұмат алуға болады. Кері байланыс жүйесі арқылы сайтты қолданушылар өз пікірлері мен ұсыныстарын қалдыра алады.
Ұлттық формуляр құрамына енген дәрілік заттардың тізімі тұрақты түрде жаңартылып отырмақ. Бұл дәрілік заттарды тағайындайтын дәрігерлерге жаңа тіркелген медициналық препараттар туралы, олардың кері әсері жайында ақпаратты уақытылы алуға, дәрілердің мөлшерлемесін белгілеу бойынша шешімдерін растауға, тиімді емдеу курсын тағайындауға көмектеседі. Қарапайым азаматтар да сайтқа өз бетінше кіріп, белгіленген дәрілердің қаншалықты сапалы екенін анықтай алады.
Б.СЕРЖАНОВА,
Денсаулық сақтауды дамыту республикалық
орталығының баспасөз хатшысы