Жуырда әлеуметтік желіде қазақ ұлтына тіл тигізген қырғыздың қос ақынының айтысы жария болды.
2016 жылы Ыстықкөлде болған бұл айтыста Азамат Болғонбаев пен Аалы Туткычев деген қырғыздың қос ақыны сөзін «оңбаған қазақ» деп бастап, оны “маңқа қазақ” деп аяқтап, екеуі қазақ халқына, оның ұлттық құндылықтарына, мәдениетіне тіл тигізеді. Айтыс сахнасынан ауыздарына келгенді айтқан екеудің бұл «ақындығы» қазақ-қырғыз қарым-қатынасына сызат түсіргені анық.
Осыған қатысты мәселе көтерген “Abai.kz” ақпараттық порталына бүгін Қырғыз елшілігі кешірім сұрап, түсініктеме берген.
– Мен “Abai.kz” ақпараттық порталында жарияланған мақаламен және онда көрсетілген бейнежазбамен танысып шықтым. Шынтуайтына келгенде, қатты ұялып отырмын. Бауырлас екі елдің тыныштығын бұзатындай ауыр сөздер айтылған екен. Сол үшін Қырғыз Республикасы және қырғыз халқы атынан қазақ халқынан кешірім сұраймын. Өздеріңіз де мақалада айтқандай, екі ақынның сөзі күллі қырғыз халқының сөзі емес, әрине. Мен және бір мәрте қазақ халқынан осы бір жәйт үшін кешірім сұраймын, -деді Қазақстандағы Қырғыз елшілігінің бірінші хатшысы Шолпанай Әбдісаматқызы.
Сондай-ақ, Шолпанай Әбдісаматқызының айтуынша, Аалы Туткычев бастап, Азамат Болғонбаев қоштаған қырғыз ақындарына ресми түрде Қырғызстан Үкіметі тарапынан шара қолданылатын болады.
– Біз бірінші кезекте бұл екі ақынның айтыста айтқан сөздерін келтіре отырып, Қырғыз Республикасының Мәдениет министрлігіне және Сыртқы істер министрлігіне хат жазамыз. Ол жақтан ресми жауап келгенде сіздердің порталдарыңызға жолдап, екі ақынға қатысты қандай шара қолданылатынын айтатын боламыз. Ал әзірге мен нақты қандай шара қолданылатынын білмеймін. Бірақ, қандай да бір реакция болатыны сөзсіз. Айыпқа бұйырмаңыздар, сіздерден тағы да кешірім сұраймын”,-деді елшілік өкілі.