Бүгін, 2-қарашада Алматы соты осы жазда 10 адамның өмірін қиған Руслан Күлікбаевқа қатысты үкім шығарды. Ол өлім жазасына кесілді.
Сот бұл үкімнің қайта қарауға жатпайтынын жариялады.
“Мен бұл үкім әділ деп есептеймін, өйткені лаңкестік қылмыс ешқандай ақтауға жатпайды. Үкім өлім жазасын қарастыратын Қазақстан заңына сүйене отырып, жарияланды. Бірақ Қазақстанда өлім жазасына мораторий жарияланған, сондықтан ол өмір бойы бас бостандығынан айыру жазасына автоматты түрде көшеді”, – деді депутат Мәулен Әшімбаев.
Оның айтуынша, мораторий барлық қылмыскерді қамтиды.
“Белгілі бір адамдар үшін мораторий күші болмайды екен деген еш қисынға келмейді. Мораториға өлім жазасына кесілгендердің барлығы енеді”, – деді Әшімбаев Күлікбаевтың атылып кетуі мүмкін бе деген тілші сауалына берген жауабында.