Декларация тапсыратындар байлығын туысқандарына жаза алмайды
Мәжіліс депутаты Бақытжан Базарбек жалпыға ортақ декларациялау тақырыбына алдағы жылдары қайта оралуымыз керек деп есептейді.
«Мен декларациялау туралы нақты айттым. Бұл мәселеге қайтадан оралуымыз керек. Себебі бұл жерде жемқор шенеуніктер мемлекеттің қаржысын, мүлкін елден шығарған кезде өзінің атына рәсімдемейді, оны туған-туысқандарының, алыс туыстарының атына рәсімдейді. Мен жалпы Президенттің негізгі бағытын қолдаймын», – деді депутат Мәжіліс кулуарында.
Оның айтуынша, 8 миллион адамды қазір бұл жауапкершіліктен босатылса, жемқорлардың іс-әрекетіне баға берілмей қалады.
«Жалпы сыбайластық жемқорлықпен шынайы күресеміз, жемқорлардың мемлекеттің бюджетіндегі ұрлаған ақшасын мемлекет меншігіне қайтарамыз, шынайы күресті жүргіземіз десек, көзбояушылық емес, біз кейін салмақты түрде бұл мәселеге қайтадан оралуымыз керек», – деді Бақытжан Базарбек.
Қаржы министрі Мәди Тәкиев депутат Бақытжан Базарбектің декларацияға қатысты пікіріне жауап берді.
«(Декларация тапсыратын адамдар байлығын), мүлігін өзінің туысқандарына жаза алмайды. Егер жазса, онда туысқаны қай көзден қандай мүлік сатып алғанын көрсетеді. Оны «туысқаным берді» деп айтпайды ғой. Сондықтан оны тексеру жеңіл», – деп түсіндірді министр.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе