Ақтөбеде содырлар сойқан салған әскери бөлімнің қос майорына қатысты сот үкімі шықты. Лаңкестер шабуыл жасаған күні кезекшілікке жауапты болған Қайнарбек Тастанбеков 4 жарым жылға, ал оның көмекшісі Қайырғали Оразжанов 3 жарым жылға бас бостандығынан айрылды.
Бұл туралы КТК хабарлайды.
Үкімнің мұншалықты ауыр болатынын соттаулшылар күтпеген сыңайлы. Өйткені бұған дейін мемлекеттік айыптаушы әскерилердің бірін үш жылға соттап, екіншісіне екі жылға шартты түрде жаза кесуді сұраған.
Бір айға созылған сот процесінің нүктесі №6655 әскери бөлімінде қойылды. Судья содырларға қарсы қару алып, қарсылық көрсетпеді деп айыпталған қос майорға қатысты үкімді осында оқуды жөн деп тапқан. Бұл өзге әскерилерге сабақ болсын деген ойдан туса керек.
Соттың соңғы отырысын өткізуге әскери бөлімнің клубын дайындапты. Мұнда үкімді тыңдауға 7 ай бұрын дәл осы маңда болған лаңкестік оқиғаның куәгерлерін түгел жинаған. Арасында бөлім басшыларынан бастап, жауынгерлерге дейін бар. Сотталушылардың туыстары да келген. Дегенмен, қос майорға кесілген жаза олар күткендей жеңіл болмады.
– Тастанбековті кінәлі деп танып, 4 жыл 6 айға бас бостандығынан айырылсын. Жазасын жалпы тәртіптегі колонияда өтейтін болады. Майор шенінен де айырсын. Оразжановты да кінәлі деп танып, 3 жыл 6 айға бостандығынан айыру жазасы кесілсін. Ол да әскери шенінен айырылсын.
Қос бірдей әріптесінің қолына кісен салғанын көрген офицерлер орындарына сылқ отыра кетті. Өйткені, Астанадан келген мемлекеттік айыптаушы бұған дейін Қайнарбек Тастанбековтің 3 жылға соттап, Қайырғали Оразжановты шартты түрде жазаға кесуді сұраған. Бірақ сот үкімі одан асып түсті. Жұбайының түрмеге отыратынын естіген Тастанбековтің жары сол жерде көз жасына ерік берді. Тергеу кезінде өз кінәсін мойындаған Оразжановтың жақындары қазір не істерін білмей дал. Ал осы әскери бөлімде штаб бастығының көмекшісі болған Тастанбековтің адвокаты үкіммен келіскен жоқ.
Станислав Никифоров, Қ. Тастанбековтің адвокаты:
– Сот үкімі куәгерлердің берген жауаптарына қайшы. Куәгерлер Тастанбековтің шабуыл туралы хабар бергені, оның атысқаны туралы айтты. Мұны судья ескермеген. Біз қарсы арыз түсіреміз.
Қос майор тәуелсіздіктің 25 жылдығына орай жарияланған рақымшылыққа да ілікпей қалды. Өйткені бұлардың жағдайы ондағы тізімге сәйкес келмейді екен.