Бұрын мұндай ота үшін Алматыға баратын: Маңғыстауда жоғары технологиялы медицина дамып келеді

Медицина мамандарының айтуынша, өңірде катаракта, глаукома, торқабықтың күрделі патологиялары, витреоретиналды хирургия, көз ішілік линза имплантациясы, қылилық және басқа да күрделі офтальмологиялық ауруларға операциялар тұрақты жүргізіледі.

Сонымен қатар соңғы жылдары ЛОР хирургиясының мүмкіндіктері де кеңейген. Бүгінде эндоскопиялық мұрын қуысы операциялары, тимпанопластика, стапедопластика, септопластика, аденотомия және есту қабілетін қалпына келтіруге бағытталған жоғары технологиялы хирургиялық емдер өңірде жасалуда.

Брифингте сөз сөйлеген түркиялық офтальмохирург Эрол Джошкун көз ауруларын ерте анықтаудың маңыздылығына тоқталды.

-Адамдардың көбі дәрігерге көру қабілеті айтарлықтай төмендеген кезде ғана келеді. Ал глаукома мен торқабық аурулары ұзақ уақыт бойы ешқандай белгі бермеуі мүмкін. Сондықтан профилактикалық тексерулер – көру қабілетін сақтап қалудың ең тиімді жолы, – деді ол.

ЛОР-хирург Аягөз Бейбітова да заманауи технологиялардың хирургиялық емнің қауіпсіздігін арттырып, науқастардың оңалу мерзімін қысқартқанын айтты.

Брифинг барысында өңірлерде жоғары технологиялы медицинаның дамуының әлеуметтік маңызы да сөз болды. Сарапшылардың пікірінше, күрделі операциялардың облыс орталықтарында жасалуы тұрғындардың уақытын үнемдеп қана қоймай, жол шығынын азайтады, емді кешіктірмеуге мүмкіндік береді және жалпы медициналық көмектің қолжетімділігін арттырады.

Соңғы жылдары Қазақстанда жоғары технологиялы медициналық қызметтерді өңірлерге кезең-кезеңімен енгізу жұмыстары жүргізіліп келеді. Бұл халықтың сапалы медициналық көмек алу үшін міндетті түрде республикалық орталықтарға баруына тәуелділікті азайтуға бағытталған.

Брифинг барысында қазақстандық және шетелдік дәрігерлердің бірлескен жұмысы жаңа технологияларды енгізуге, тәжірибе алмасуға және өңірлердегі медициналық көмектің сапасын арттыруға мүмкіндік беретіні айтылды.

Мамандар тұрғындарды денсаулыққа немқұрайлы қарамауға шақырды. Өйткені көз және ЛОР ауруларының басым бөлігі алғашқы кезеңде ешқандай белгі бермейді. Ал ерте қойылған диагноз ауыр асқынулардың алдын алып, ем нәтижесін бірнеше есе жақсартады.

Сарапшылардың пікірінше, өңірлерде жоғары технологиялы медицинаның дамуы – денсаулық сақтау жүйесінің сапасын бағалайтын негізгі көрсеткіштердің бірі. Маңғыстаудағы бүгінгі тәжірибе соның нақты мысалы. Бұл – бір өңірдің жетістігі ғана емес, медициналық көмектің халыққа жақындай түскенін көрсететін маңызды үрдіс.