Бүгін елордада Сириядағы ахуалды реттеу жөніндегі Астана процесінің VI-раунды өз жұмысын бастайды.
Бұл туралы ҚР Сыртқы істер министрлігінің баспасөз қызметі хабарлады.
«Қазақстан астанасына жиынға қатысушы барлық тарап келді. Ресей делегациясына РФ Президентінің Сирия мәселелерін реттеу жөніндегі арнайы өкілі Александр Лаврентьев, Түркия мен Иран делегацияларына аталған елдердің Сыртқы істер министрлерінің орынбасарлары Седат Онал мен Джабер Ансари басшылық жасайды.
Сонымен қатар БҰҰ Бас хатшысының Сирия жөніндегі арнайы өкілі Стаффан де Мистура, америкалық делегацияның басшысы – АҚШ мемлекеттік хатшысының Таяу Шығысты реттеу жөніндегі көмекшісінің міндетін атқарушы Дэвид Саттерфильд, иорданиялық делегация басшысы аталған елдің Сыртқы істер министрінің саяси мәселелер жөніндегі кеңесшісі Науаф Уасфи Тель жиынға қатыспақ. Мұнан бөлек, сириялық қарулы оппозицияның 24 өкілетті өкілдері де келді», – делінеді ҚР Сыртқы істер министрлігі таратқан хабарламада.
Бүгін Астанада кеше өткен эксперттік консультациялардың нәтижелері қаралып, бұған дейін келісілген күн тәртібіндегі мәселелерге сәйкес келіссөздер өткізілмек деп күтіледі.