Алматыда қамаудағы журналист Жанболат Мамайдың үстінен сот процесі жалғасып жатыр. Сотта мемлекеттік айыптаушы прокурор Мамайға ресми айыптау актісін оқыды.
«Саяси қалам. Трибуна» газетінің бас редакторы Жанболат Мамайға қатысты «қылмыстық жолмен алынған ақшаны заңдастыру» ісі бойынша куә ретінде БТА банктің басқарма төрағасының орынбасары болған Жақсылық Жарымбетов шақырылды.
Биыл маусым айында Алматы сотында бұрынғы БТА банктің басшысы болған Мұхтар Әбіләзовтың ісі бойынша Жарымбетов шартты түрде сотталған. Қаңтар айында оны Түркиядан Қазақстанға экстрадициялаған.
Тергеу ісі бойынша Мамайдың оппозициялық саясаткер Мұхтар Әбіләзов ұрлаған ақшаны заңдастыруға қатысы бар. Мамайдың өзі Әбіләзовқа қатысы барын жоққа шығарады. Өзіне тағылған айыптың саяси астары бар дейді.