2016 жылы «Бизнестің жол картасы-2020» бағдарламасы аясында 155 млрд теңгеге жуық сомаға салық түсіп, кемінде 25 мың жұмыс орнын ашу және оны сақтап қалу болжанып отыр.
Бұл туралы «Даму» кәсіпкерлікті дамыту қоры» АҚ басқарма төрағасы Қаныш Төлеушин Азиядағы өзара іс-қимыл мен сенім шаралары жөніндегі кеңестің (АӨСШК) V бизнес форумында айтты, деп хабарлайды BNews.kz.
«БЖК-2020 бағдарламасы қолға алынған кезден бастап алты жыл ішінде қатысушылар 1,6 млрд АҚШ доллары – 534 млрд теңге сомасына салық төлеген, 17,4 млрд АҚШ доллары – 5,8 трлн теңге сомасына өнімнің жиынтық көлемін қамтамасыз еткен, 300 мыңнан астам жұмыс орнын сақтап, ашқан», – деді Қаныш Төлеушин.
Оның айтуынша, төленген салық көлемі төленген субсидия көлемінен төрт есе асады, бұл мемлекеттік бюджетке қаражат қайтарымының жоғары коэффициентін растайды.
«2016 жылы бағдарлама қорытындылары бойынша 155 млрд теңгеге жуық сомаға салық түсімі, кемінде 25 мың жұмыс орнын ашып, сақтау болжануда», – деп толықтырды Қаныш Төлеушин.