Бірыңғай жинақтаушы зейнетақы қорының экс-басшысы сотта өз кінәсін мойындады
Алматыда «Бірыңғай жинақтаушы зейнетақы қоры» АҚ экс-басшылығының ісі бойынша алдын ала сот тыңдалымы өтті.
Бұл туралы ҚазАқпарат хабарлады.
Сотта «БЖЗҚ» экс-басшысы Руслан Ерденаев кінәсін мойындады.
Руслан Ерденаев пен өзге де тұлғаларға меншікке қатысты ҚР Қылмыстық кодексінің 189-бабының 4 тармағы бойынша ауыр қылмыс жасады деп айып тағылып отыр. Ерденаевтың қорғаушысы Александр Блок өзінің қорғауындағы азаматтың өз кінәсін мойындап, істеген ісіне өкініп отырғанын айтты.
«Сотқа дейінгі тергеу барысында Руслан Ерденаев тергеушілермен бірге жұмыс жасауға ынта білдірді. Аса ауыр қылмыстардың ашылуына септігін тигізді, өз кінәсін мойындады және оған өкініш білдірді», – деді адвокат.
Еске сала кетейік, Алмалы аудандық соты 2017 жылдың 9-қаңтарында «БЖЗҚ» АҚ экс-төрағасы Руслан Ерденаевқа, «БЖЗҚ» АҚ тәуекелдерді басқару департаментінің басшысы Мұса Бахытовқа, «Алатау Мұнай Алтын» АҚ бақылау кеңесінің төрағасы Бақытжан Кенжебаевқа, «Бузгул Аргум» ЖШС директоры А.Найзағаринге қатысты бұлтартпау шарасын тағайындаған болатын.
Сотқа дейінгі тергеу орындары Руслан Ерденаев пен өзге де тұлғаларға меншікке қатысты ҚР Қылмыстық кодексінің 189-бабының 4-тармағы бойынша ауыр қылмыс жасады деп айып тағып отыр.
Айта кетейік, жыл басында Ұлттық қауіпсіздік комитетінің Алматы қаласындағы департаменті БЖЗҚ-ның құны 5 млрд теңге болатын келісімшартын тексерген болатын. Ұлттық банктің қатысуымен «Бірыңғай жинақтаушы зейнетақы қоры» АҚ-ның әрекетін тексеру өткен жылдың 21 желтоқсанынан басталған.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе