Бірқатар ақпарат құралдарында танымал продюсер Баян Есентаеваның «көңілдесі» деп айыпталған атыраулық кәсіпкер, NSS компаниялар тобының иесі Ибрагим Акдрашев Ақ Жайық газетіне аталған айыптауға қатысты түсінік берді, – деп хабарлайды Qamshy.kz.
Осыдан бірнеше күн бұрын Фейсбук әлеуметтік желісінде РИНАТ БЕКТАСУЛЫ деген қолданушы Баян Есентаева мен Ибрагим Акдрашев арасында тағыз қарым-қатынас барын, қазір кәсіпкер продюсердің бұрынғы күйеуі Бақытбек Есентаевты соттатуға барын салып жатқанын жазған. Ал, жазбаны бірнеше ақпараттық сайт көшіріп, жариялаған.
Бірақ, кейін фейсбуктегі әлгі даулы жазба өшірілген.
Ал, И. Акдрашев бұл жазбаға қатысты былай деп пікір білдірген: «Мұның барлығы – өтірік. Мен Баян Есентаевамен жеке таныс емеспін, өмірімде кездестірмеген адамым. Өзім туралы мұндай өсектерге мән бермей-ақ қояр едім, Есентаеваның басындағы жағдайды біліп отырып, үнсіз қала алмадым.
Мен басқа да ел азаматтары сияқты Баян Есентаеваның басындағы жағдайға шын көңіліммен алаңдаймын. Ал, мен туралы жалған ақпараттың тарауына келсек, мұндай жағдай бірінші рет болып отырған жоқ. Айтса да, бірнеше жыл бойы осындай жалған ақпарат таратып келген екі адамның үстінен қазір қылмыстық іс қозғалған. Соңғы жарияланыммен де заңгерлеріміз айналысып жатыр».
Ал, кәсіпкердің заңгері Б. Есентаева мен И. Акдрашевтің байланысы туралы ақпарат таратқан ақпарат құралының мекен-жайын тапқандарын, демалыс күндері өткен соң олардан ақпаратты терістеуді талап ететінін айтып отыр.