“Басқа бәле тілден”. Астана әуежайында елші ұсталды

1-мамырда Астана әуежайында Ауғанстанның Қазақстандағы бұрынғы елшісі Мохаммад Фарук Бараки ұсталып, сұрақ-жауаптың астында қалды.

Ол қызмет мерзімі аяқталғандықтан, Кабулға бет алған, – деп хабарлайды Afghanistan.ru.

Ауғанның 1TV арнасының мәліметінше, кеденшілер: “Жүкте не бар?” деп сұрағанда Мохаммад Фарук Бараки: “Жарылғыш зат бар” деп қарап тұрған. Қызметін аяқтап, еліне қайтып бара жатқанына өте қуанышты экс-елші осылайша қалжыңдаймын деп, басы бәлеге қалған. Өйткені оның жауабынан соң әуе-жайда шұғыл төтенше шаралар қабылданған. Әуежайдың кіреберісі қоршауға алынып, оқиға орнына арнайы қызметтің 100 қызметшісі барған. Дипломат 3 сағат бойы қамауда болып, Қазақстан СІМ қызметкерлері араша түскеннен кейін ғана босатылған.