Балалар коронавирустың жасырын таратушылары екені анықталды

Қытайлық Гуанчжоу балалар орталығының мамандары  COVID-19 вирусын жұқтырған отбасылардың 2 айдан 15 жасқа дейінгі 745 баласын тексеруден өткізді, деп хабарлайды «Известия».

Барлық кәмілетке толмаған балалар талдама тапсырған. Олардың ішенен тек 10 ғана (1,3%)  ауру жұқтырғаны анықталды. Алайда олардан аурудың барлық белгілері бірдей байқалмаған. Жеті баланың денесі қалтырап, дене температурасы 39 градусқа көтерілген. Бірақ ересек адамдардағыдай бұлшықеттерінің ауруы, әлсіздік, тыныс алуының қиындауы секілді белгілер байқалмаған. Сондай-ақ пневмония  секілді асқынулар бірде-бір балада анықталмады.

Алайда балалар ұзақ уақыт бойы ауру таратушысы бола алады. Олар сауыққаннан кейін, тамағы мен мұрнынан алынған жағынды COVID-19 вирусының жоқ екенін білдірсе, нәжісінің талдамасы организмде  вирустың бар екенін көрсеткен. Ғалымдардың пікірінше, балаларды карантинде ұзағырақ ұстау керек.