Өзбекстандық бала күтуші Гүлчехра Бобокулованы мәжбүрлі түрде емдеуге жіберді, деп хабарлады “Интерфакс”. Мәскеу прокурорының ресми өкілі Елена Россохинаның агенттікке мәлімдеуінше, Бобокулованы Ресейдегі психиатриялық стационар мекемелерінің біріне жатқызды.
Прокуратурадағылар жәбірленуші тараптың мемлекеттік айыптаушы ұстанымына қарсы шықпағанын атап өтті.
Сот мәліметі бойынша, күтуші баланы әуелі тұншықтырып өлтіріп, одан соң басын кесіп алған. Бобокулова баланың ата-анасы жалдаған пәтерді өртеп жіберу арқылы жәбірленуші тарапқа 5 млн 57 мың рубль көлемінде материалдық шығын әкелді. Бобокулова кінәсін мойындады. Ол өзінің бұл әрекетін “Алланың қалауы” деп түсіндірген.
Өзбекстан құқыққорғау органдарының мәліметі бойынша, бала күтуші шизофрениямен ауырады, елінде бірнеше мәрте ем қабылдаған.
2016 жылы 29 ақпанда полиция Мәскеуде өртенген пәтерден басы кесілген төрт жастағы қыздың денесін тапқан. Кейінірек “Октябрьское поле” метро станциясының маңында 38 жастағы Бобокулова ұсталды. Ол кесілген басты қолына ұстап, көшеде “Аллах акбар” деп айқайлап жүрген.