Америкалық үкіметтік этика жөніндегі Кеңсе жаңадан сайланған президент Дональд Трампқа, Ақ үйге көшкенде мүдде қайшылықтары туындамас үшін, өзінің бизнес активтерін сатуға немесе басқа бір сенімді өкілдерге тапсыруға кеңес берді.
Сейсенбі күні жарияланған хат бойынша, Трамптың өз кәсібін басқаруды балаларына ұстата салуы – этикаға сай қадамға жатпайды.
Трамптың АҚШ-тағы және шетелдегі активтері – лицензиялық келісімдері, гольф клубтары, коммерциялық жылжымайтын мүліктері оның президент ретінде қабылдайтын шешімдеріне елеулі түрде ықпал етуі мүмкін. Заңда атқарушы билік органдарында жұмыс істейтіндерге өзінің және туыстарының қаржы мүдделеріне сай саясат жүргізуге тыйым салынған.
Бейсенбі күні Дональд Трамп активтерін қалай жарататынына қатысты баспасөз жиынын өткізуі керек еді. Бірақ ол келесі жылдың қаңтар айына шегерілді.