Астана қаласынан Қарағанды облысына өзінің автокөлігімен шығып, кейін ізтүссіз жоғалып кеткен 40-жастағы азаматты іздестіру үшін жедел іздестіру тобы құрылды.
Бұл туралы Қарағанды облысының ішкі істер департаментінің баспасөз қызметі хабарлады.
Іздестіру іс-шараларын жүргізу барысында полиция қызметкерлерімен Қарағанды облысындағы су қоймаларының бірінен ішінде ізтүссіз жоғалған азаматтың мәйіті бар автокөлік табылды.
30 қазан күні облыстық криминалдық полиция басқармасының қызметкерлерімен жүргізілген жедел іздестіру іс-шаралары барысында аталған қылмысқа қатысы бар деген күдікпен Абай қаласының 30 жастағы тұрғыны анықталып ұсталды.
Күдікті азамат 23-қыркүйекте өзара келісе алмай, жанжалдасып, жәбірленушіні өлтіріп алады. Қылмыстың ізін жасыру мақсатында мәйітті автокөлігімен су қоймасына итеріп, батырып жібереді. Күдікті осылай қылмысын мойындап, түсініктеме берді.
Бүгінгі таңда күдікті уақытша ұстау изоляторына қамалып, тергеу амалдары жүргізілуде.