Астанаға басқа аймақтардан келген көлік жүргізушілері үш күннен соң ақы төлеуі мүмкін деп хабарлайды “Астана” арнасы.
Бұл туралы қалалық мәслихаттың тоғызыншы сессиясында Елорда әкімінің орынбасары айтты. Қосман Айтмұхаметов көшелердегі кептелісті көліктің көптігімен түсіндірді. Қыркүйек айындағы мәліметті келтірді. Оның айтуынша, Астанада 343 мың автокөлік тіркелген. Тәулік сайын 70 мың көлік кіріп-шығады. 35 мыңдай көлік тіркелмеген.
Астана әкімінің орынбасары шағын айналмалы жолдың құрылысы жайлы да баяндап өтті. Оның жалпы ұзындығы 35 шақырымды құрайды. 2008 жылдан бері 22 шақырым салынған. Тәулігіне 90 мың көлікті өткізіп, жол кептелісін азайтуға мүмкіндік бермек. 20 мыңдай көлікті қала орталығына жеткізбей, айналдырып өткізе алады.
2017-2019 жылдарға аталған жобаға 190 млрд теңге қосымша қаражаттың керегін алға тартты әкім орынбасары. Бүгінде ЛРТ компаниясы жобасын ықшамдап, 89 млрд теңге үнемдеген. Бұл қаржы да аталған жобаға жұмсалмақ.