Араб Әмірлігінде тұрып жатқан Қазақстан азаматы ҚР сыртқы істер министрі Қайрат Әбдірахманов пен Қазақстанның Дубайдағы бас консулы Мадияр Меңілбековке бизнестегі қиындықтарын шешіп бергені үшін алғыс айтты.
Бұл туралы ҚР Сыртқы істер министрлігі баспасөз қызметінің басшысы Әнуар Жайнақов Facebook-тегі жеке парақшасында жазды.
Қазақстан азаматы жазған хаттағы дерекке сүйенсек, олар қызының сырқатына байланысты Дубайға көшуге мәжбүр болған екен. Ол жақта отбасы футкорт ашып көреді, бірақ жергілікті заңды білмегендіктен, бизнес жүргізу қиын болып, “тығырыққа тіреледі”. Сөйтіп отбасы жалға берушілерге 180 мың дихрам (шамамен 50 мың доллар) қарыз болып қалған.
“…Біздің дипломаттар бұл іске араласқаннан кейін, әуелі соманы екі есе төмендетуге мүмкіндік туды, ал бас консул ғимарат басшысымен кездескеннен соң “біздің елге деген сый-құрмет ретінде” қазақстандықтардың қарызын кешіру туралы келісімшарт жасалды”, — деп хабарлады Жайнақов.