2015-2016 жылдары 1800-ден астам лауазым иелері сыбайлас жемқорлық үшін жазаланды. Бұл туралы бүгін Астанада ЭЫДҰ сыбайлас жемқорлыққа қарсы желісі құқық қорғау органдарының жетінші отырысында ҚР Мемлекеттік қызмет істері және сыбайлас жемқорлыққа қарсы іс-қимыл агенттігі төрағасының орынбасары Алик Шпекбаев мәлім етті.
«2015-2016 жылдары біздің жемқорлыққа қарсы қызметтің, ұлттық бюро жұмысының нәтижесі бойынша, 1800-ден астам лауазымды тұлғалар сыбайлас жемқорлық үшін жазаға тартылды. Олардың ішінде республикалық маңыздағы түрлі деңгейдегі басшылар 21-ден астам, облыстық -120, қалалық және аудандық- 313. 48 млрд. теңгеден астам келтірілген залал анықталды, соның ішінде орны толтырылған және тыйым салынған мүлік құны 32 млрд. теңгеден асады»,-деп тоқталды Шпекбаев.
Оның сөзіне қарағанда, әрбір тергелген қылмыстық іс бойынша отандық қылмыстық-процессуалдық кодекске сәйкес нұсқама енгізіледі. Осы ретте 1528 осындай нұсқама жіберіліп, 436 тәртіптік жаза енгізілді.
«Бұл бағыттағы жұмыстар бойынша тиісті нәтижелер айқындалды, яғни қызметін төмендетумен мемлекеттік қызметті орындаудан босатылғандар бар, сонымен қатар жұмысынан шығарылғандар да жеткілікті»,-деді ол
Сонымен қатар Алик Шпекбаев мемлекеттік қызметтен шеттетілгендер туралы айтты.
«660 лауазымды тұлға еселік айыппұлдарға тартылды. Тек екі жылда осындай айыппұлдарда еселеп төлетуден бюджетке 6 млрд. теңге түсті. Сыбайлас жемқорлыққа жол бергені үшін 924 адамға қатысты мүліктік тәркілеу жазасы қолданылды және 1200-і мемлекеттік қызметте жұмыс істеуден өмір бойына шеттетілді»,-деді Шпекбаев.
Сондай-ақ, заңнаманы ізгілендіру нәтижесінде Қазақстан дүниежүзілік түрме рейтингінде оңтайлы көрсеткіштерге қол жеткізді.
«1996 жылы Қазақстан түрмеде отырғандардың саны бойынша АҚШ пен Ресейден кейін үшінші орында болды. 20 жылдан астам уақыт өтіп, осы ретте құқықтық жүйеге енгізілген өзгерістерге байланысты Қазақстан 3-тен 62-ші орынға орналасты»,-деді агенттік басшысының орынбасары.
Оның сөзіне қарағанда, осы жылдары АҚШ екінші орынға жылжыса, РФ тек оныншы орынға жоғарылады. Бұл өз кезегінде Қазақстанда маңызды құқықтық реформалар жүргендігін байқатады.