«Алтын қазып, ауылды уламақ». Алматы облысында ауыл халқы дабыл қағып отыр

Алматы облысы Жамбыл ауданының тұрғындары кеніштен тарайтын радиациядан қырылып қаламыз ба деп қорқып отыр. Өйткені Серіктестік «Шынасыл сай» кен орнынан алтын-күмісті ашық тәсілмен өндіруді көздеген. Өміріне алаңдаған екі ауылдың халқы табиғаттың түртілуіне түбегейлі қарсы. Бұрындары адамға қауіпті радиация бар екені анықталып, жұмыс тоқтатылған. Биыл қайтадан алтын-күмісті ашық тәсілмен өндіргісі келген тағы бір компания шығыпты.

«Вlock one company деген компания барлау жүргіземіз, одан кейін Minerals Operating деген тапсырыс берушілері екен. 500 гектар жерді жарылыс жасау арқылы, ашық әдіспен кен орнын игереміз деп. Бір тоннада бір жарым грамм алтын бар екен, 27 грамм күміс бар екен», – дейді Қайрат Сейітмамытов.

Ауыл тұрғындарының алтынына да, күмісіне де таласы жоқ. Алаңдатып отырғаны өндірістің ашық тәсілмен жүретіні. Әрі бағалылардан бөлек, адамға қауіпті радиоактивті металлдардың болуы. Өйткені қопарылайын деп жатқан сайдан халық тұрмыс тіршілікке пайдаланатын, төрт түлік суғаратын өзен бастауын алады.

«Суымызды лайлайды. Бұл су Қастекке құяды, Қастектен Амангелдіге, одан Аққайнарға, одан Күртіге, Күртіміз Іле өзені Балқашқа құяды. Сонда қанша адамды улайық деп тұрмыз», – дейді Сұраншы батыр ауылының тұрғыны Ербол Мамұтов.