“Almaty Towers бизнес орталығындағы алты адам қаза тапқан өртке орталықтың әкімшілігі мен өрт сөндірушілердің де кінәсі бар” деп мәлімдеді бүгін қаза тапқандардың туыстарының адвокаты Ерлан Бекполов.
Бұл туралы Азаттық хабарлады.
2016 жылы қарашаның 6-сы күні Алматыдағы Almaty Towers бизнес орталығында өрт шығып, оқиға орнында 54 жастағы дәнекерлеуші қаза тапқан. Келесі күні өртенген ғимараттан тағы бес адамның – Алматыдағы жоғары оқу орындары студенттерінің сүйектері табылған.
Қаза тапқан бес студенттің үшеуінің – Екупжон Тохтамышев, Исмаилжон Исраилов және Абылайхан Зутебековтің жақындарының адвокаты Ерлан Бекполовтың пікірінше, өрт шыққанда өрт дабылы мен өрт сөндірудің спринклерлік (ішінде әрдайым жоғары қысымды су болатын құбыр) жүйесі жұмыс істемеген. Сонымен қатар өрт болған жағдайда сыртқа шығатын жолда кеңсе орналасуы да – заңсыз. Ол “бұл заң бұзушылықтарға бизнес орталықтың әкімшілігі мен қалалық төтенше жағдайлар департаменті жауапты” дейді.
Өрттен соң Almaty Towers әкімшілігі “барлық өрт сөндіру жүйесі мен қажетті қауіпсіздік жүйесі іске қосылды, бәрі жұмыс істеп тұрды” деп мәлімдеген еді. Төтенше жағдайлар департаменті де мұны растаған.