Алматылық зейнеткерлер тегін нанға таласып жатыр

“Бұрын алмайтынмын. Бала ақша тапқанда алмайтынмын. Қазір балалар жұмыс істейді, бірақ айлығын бермейді. Кейде жұмыстан шығарып жібереді.Сонымен нан алмағанда не аламыз? Бергенін аламыз”, – дейді зейнеткер Сәндігүл Алпысбайқызы.

Қайырымдылық шараны ұйымдастырушылар екі жыл бойы тынымсыз еңбек етіп жүр. Күнде зейнеткерлерге 130 бөлке нан тегін таратылады. Алғашында игі іске мүшелік жарнадан түсетін қаражат жұмсалған. Кейін сауда орындарында түрлі сатылымдар өткізіп, шараның ауқымын кеңейтуді қолға алыпты.

“Киімдер, не болмаса кітаптар алуға болады. Басқа да дизайнерлік бұйымдар ала аласыздар. Барлығы өздерінің үлестерін қосқысы келіп, тегін түрде береді. Немесе 50-де 50 пайыз ақшасына келісеміз. Әр түрлі жағдайда үлестерін қосады”, – дейді «Алма-Ата» әйелдер клубының мүшесі Мәдина Науқанова.

Ұйымдастырушылардың айтуынша, зейнеткерлерді бір ай тегін нанмен қамтамасыз ету үшін 200 мың теңге кетеді. Астана қаласында да күніне 20 бөлке нан таратылады екен. Тіпті, алматылық әріптестерінің бастамасын қуаттаған Жезқазған қаласының іскер әйелдер қауымы да қайырымдылық дүкенін ашып жатыр.