Алматыда Наурыз мейрамы кең ауқымда тойланады: дәстүр мен жаңаның үндестігі

21 наурыз күні сағат 11:00-де Астана алаңында «Алматы – Наурыз құшағында» атты салтанатты концерт өтеді. Көрермендерге «Дос-Мұқасан» ансамблі, Майра Мұхамедқызы, Жанар Айжанова, Өмірқұл Айниязов, Жазира Байырбекова, «КешYou» тобы, Диная, AyaFunk және басқа да танымал артистер өнер көрсетеді. Сондай-ақ, «Алатау» дәстүрлі өнер театры, «Жаңа ғасыр» театры, «Сазген сазы» фольклорлы-этнографиялық ансамблі өз бағдарламаларын ұсынады.

21-22 наурыз күндері сағат 18:00-де осы алаңда «Juldyzdy Almaty» атты екі күндік фестиваль өтеді, онда еліміздің танымал әншілері көрермендерді қуантады. Бұған қоса, спорттық ойындар, қолөнер жәрмеңкесі, фотозоналар мен өнер инсталляциялары орнатылады.

Абай алаңындағы «NauryzFest» фестивалі

21-25 наурыз аралығында сағат 10:00-16:00 аралығында Абай алаңында ұлттық мәдениет пен жаңа технологиялар тоғысқан NauryzFest өтеді.
• Республика сарайының алдында қазақтың дәстүрлі киіз үйлері тігіліп, олардың ішінде Абай, Жамбыл және Дина пайдаланған музыкалық аспаптардың көшірмелері қойылады.
• «Алматыға саяхат» киіз үйінде қаланың көрікті жерлерін виртуалды түрде тамашалау мүмкіндігі ұсынылады.
• 20 минут ішінде құрастырылатын «Инновациялық киіз үй» таныстырылады.
• Абай Құнанбайұлының 180 жылдығына арналған арт-нысандар бой көтереді.

Кешкі уақытта алаңда танымал әншілер концерт береді, ал күндіз ұлттық ойындар мен жарыстар ұйымдастырылады. Сонымен қатар, қолөнер жәрмеңкесі өтеді, мұнда қонақтар ұлттық зергерлік бұйымдар жасау, ағаш ою, былғары өңдеу және киіз басу өнерін тамашалай алады.

Панфилов көшесінде – роботтар мен виртуалды технология

Панфилов жаяу жүргіншілер көшесінде (Қабанбай батыр – Төле би аралығы) мереке заманауи технологиялармен ерекшеленеді.
• LED-экранды арка арқылы қонақтарды виртуалды аватар Ғалымжан қарсы алады.
• Цифрлық айна қонақтарға ұлттық киімде бейнесін көруге мүмкіндік береді.
• VR арқылы ежелгі дәуірге саяхат жасап, садақ атудан жарысуға болады.
• Кинетикалық туннель – ұлттық ою-өрнектер қозғалысқа еретін ерекше инсталляция.
• Гастрономиялық аймақта робот даяшылар, аспаздар мен баристалар қызмет көрсетеді.
• «Ой-Думан» интеллектуалдық ойыны Наурыз туралы білімді тексеруге мүмкіндік береді.
• Робототехника көрмесі өтеді.

Арбаттағы кітап жәрмеңкесі мен ұлттық ойындар

21-25 наурыз аралығында Алматы Арбатында «Наурыз тойы – мерекем, салт-дәстүрім – берекем» атты кітап жәрмеңкесі өтеді.
• Қонақтар жазушылармен кездесіп, ақындар айтысын тамашалайды.
• Ұлттық ойындар мен шеберлік дәрістері ұйымдастырылады.

5000 адам Абай әндерін хормен орындайды

22 наурыз күні сағат 9:30-да Наурыз мейрамы мен Абайдың 180 жылдығына арналған ерекше хор перформансы өтеді.
• 5000 адам «Көзімнің қарасы», «Желсіз түнде жарық ай», «Айттым сәлем, Қаламқас» әндерін хормен шырқайды.
• Шара Абай даңғылы бойында (Назарбаев – Достық аралығы) өтеді.
• Бұл оқиға Рекордтар кітабына енуі мүмкін.

Nauryz Fashion Day – ұлттық киімдер мерекесі

18 наурыз күні сағат 14:30-да Алматы Арбатында Nauryz Fashion Day өтеді.
• «Әлемді таңқалдырған қазақ әжелері» жобасының қатысушылары, «Мисс Қазақстан» жеңімпаздары ұлттық киім үлгілерін көрсетеді.
• AtelierRaushan мен Aida KaumeNOVA сән үйлері ұлттық стильдегі жаңа топтамаларын ұсынады.
• Қала тұрғындары мен қонақтары этностильде киініп келіп, сән көрсетілімінің қатысушысы бола алады.

«Түркі әлемінің мега жұлдыздары» концерті

22 наурыз күні сағат 20:00-де «Almaty Arena»-да «Түркі әлемінің мега жұлдыздары» концерті өтеді.
• Оған Sadraddin, Mustafa Sandal, Roza Zergerli, Алексей Чумаков, Burak Özçivit және «Tynda Music» оркестрі қатысады.
• 20-25 наурыз аралығында метро бекеттерінде музыкалық перформанстар мен музей көрмелері өтеді.

Алматыдағы Наурыз мейрамының әр күні ерекше мазмұнға ие болады. Сенбіліктер, қайырымдылық акциялар, ұлттық ойындар, қойылымдар және басқа да шаралар ұйымдастырылады. Толық бағдарлама Алматы қаласы әкімдігінің сайтында жарияланған.