Алматыда көлік алам деген 13 азамат алданып қалған
Алматыда көлік алмақшы болған 13 азамат алаяқтық құрбаны болып, уәкілетті органға шағым түсірді.
Бұл туралы Baq.kz хабарлады.
Алматы қаласы ІІД ресми өкілі Салтанат Әзірбек хабарлағандай, полицияға көлік алғым келіп алаяқтық құрбаны болдым деген он үш адамнан шағым түсті. Бүгінде ҚР ҚК 189 бабы 4 бөлімі 2 пункті (сенiп тапсырылған бөтен мүлiктi иемденiп алу немесе талан-таражға салу) және ҚР ҚК 190 бабы 4 бөлімі 2 пункті (ірі көлемде алаяқтық жасау) бойынша қылмыстық іс қозғалды.
«Қазіргі таңда сотқа дейінгі тергеу жұмыстары жүргізілуде, күдіктілер тобы анықталуда. Тергеу жұмысының нәтижесі бойынша нақты қанша адам алаяқтық құрбаны болғаны белгілі болады, себебі тергеу барысында тағы да адамдар шағымдануы мүмкін. Сонымен қатар, аталмыш қылмыстық іске кімдер қатысты екені анықталады», – деді Салтанат Әзірбек.
«Біз компаниямызға қатысты алаяқтық фактісін растаймыз. Барлығы тергеу барысында мәселенің ақ қарасы ажыратылып, барлық фактілер белгілі болады деген ойдамыз, бізде тергеуге жүгініп отырмыз», – деді «Тойота Сити» дилерлік орталығының заңгері Дастан Рахимов.
Естеріңізге сала кетейік, бұған дейін тoyota көлігін сатып алмақшы болған алматылықтардың алданып қалғанын хабарлаған болатынбыз.
Ақылбек Мұхаметченовтың айтуынша, ол Toyota Land Cruiser көлігін сатып алу үшін алдын ала 22 млн теңге төлем төлеген.
«Мен автосалонға досыммен бардым. Бізді менеджер қабылдап, келісім жасадық, сосын ол бізге төлем жасау үшін есепшот берді, алайда кассалық аппарат істемей қалды деп түсіндірді. Мен оған сендім, себебі бұл базар емес, салмақты мекеме деп ойладым. Мен 22 млн теңге көлемінде алдын ала төлем жасадым, тоғыз күннен кейін қоймаға көлігім келгенде келесіз тағы сегіз миллион теңге төлейсіз, сосын көлігіңізді алып кетесіз деді. Тоғыз күннен кейін келдім, не көлік, не ақшам, не менеджер жоқ», – деді ол.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе