Алматыда бейнебақылау камералары арқылы 70 мыңға жуық құқық бұзушылықтар анықталды.
Бұл туралы Алматы қаласының ішкі істер департаментінің баспасөз қызметі мәлім етті.
Көшедегі құқықбұзушылықтар мен бөтеннің мүлкін ұрлау қылмыстарының алдын алуда бейнебақылау жүйесін дамыту маңызды рөл атқарады.
«Қала тұрғындарының қолдауының арқасында «Қауіпсіз аула» және «Қауіпсіз қала» жобаларын іске асыру барысында 5 мың аулаға (32 мың камера) және әртүрлі меншік формасындағы 7 мың объектіге (36 мың камера) 68 мың бейнекамералар орнатылды. Қазір қалада барлығы 75 мыңнан астам бейнебақылау камерасы жұмыс істейді. Олардың көмегімен 34 мың әкімшілік құқықбұзушылықтар мен 33 мыңға жуық жол қауіпсіздігі ережесін бұзу оқиғалары анықталды. Азаматтар өздерінің пәтерлері мен үйлерін қорғау дабылдар жүйесіне қосуда белсенділік танытып, қала тұрғындарының 79 мың тұрғын үйі қорғауға алынды»,- деп хабарлады Алматы қаласының ІІД Жергілікті полиция қызметінің бастығы полиция подполковнигі Жасұлан Байкенов.