Алматыда 90 күнде өрт сөндіру бөлімі салынды

8 қантар, 19:30

Жаңа бөлімшенің ерекшелігі — құрылыс жұмыстарының қысқа мерзімде аяқталуы: өрт сөндіру бөлімі жылдам тұрғызылатын модульдік конструкциялардан салынып, небәрі 90 күнде толықтай бой көтерді. Мұндай тәсіл қаладағы халқы тығыз орналасқан аудандардың қауіпсіздігін қысқа мерзімде күшейтуге мүмкіндік берді.

Салтанатты рәсім барысында жеке құрамға заманауи өрт сөндіру-құтқару техникасының кілттері табысталып, адал қызметі үшін алғыс хаттар берілді. Іс-шараның атмосферасы құтқарушы мамандығының маңыздылығын және күн сайын қауіпсіздік күзетінде тұрған жандарға мемлекет тарапынан көрсетілетін жоғары сенімді айқындады.

ТЖМ басшысы өрт сөндірушілер мен құтқарушыларға арнаған сөзінде материалдық-техникалық базаны дамыту және қызмет етуге лайықты жағдайлар жасау тек бөлімшелердің жауынгерлік дайындығына ғана емес, қаланың әрбір тұрғынының қауіпсіздігіне салынған инвестиция екенін де атап өтті.

«Заманауи инфрақұрылым — бұл әрекет ету жылдамдығы, жеке құрамның сенімділігі және құтқарылған адам өмірі», — деп министр атап өтті.

№15 өрт сөндіру бөлімінің жауапкершілік аймағында 30 мыңнан астам тұрғын және 126 шаруашылық субъектісі бар. Бөлімше Алматы қаласының орталық бөлігінің, сондай-ақ оған іргелес шағын аудандар мен тұрғын үй кешендерінің өртке қарсы қорғалуын қамтамасыз етеді.

Жаңа бөлім толыққанды автономды кешен болып табылады. Мұнда кезекші ауысымға арналған әкімшілік-тұрмыстық блок, сондай-ақ Batyr team кәсіби спорт залы, воркаут аймағы және жеке құрамның демалуына арналған үй-жайлар бар. Нысан жеке жылу пунктімен, инженерлік желілермен, қауіпсіздік және бейнебақылау жүйелерімен, сондай-ақ заманауи өрт сөндіру-құтқару техникасымен жарақталған.

№15 өрт сөндіру бөлімінің ашылуы жаңа ғимаратты пайдалануға берумен ғана шектелмей, Алматы қаласының құтқару қызметтері инфрақұрылымының жаңа стандартын қалыптастыруға айналды.