Алматыда 42 мың халық сел мен көшкін жүру қауіпі бар аймақта тұрады
ҚР Парламенті Сенатының халықаралық қорғаныс және қауіпсіздік комитетінің төрағасы Дариға Назарбаева бастаған жоғарғы палата депутаттары Алматы қаласының селге қарсы дайындығымен танысты, деп хабарлайды ҚазАқпарат тілшісі.
«Алматы қаласының сел және көшкін жүру қауіпі бар жерлерінің картасын әзірледік. Сел жүру қауіпі бар аудандардағы адам саны 42 мың болса, 6 мың нысан да осы қауіп картасына кірді»,-деді ҚР ІІМ Төтенше жағдайлар комитетінің «Қазақстанның селден қорғау» мемлекеттік мекемесінің басшысы Тоқтар Баймолдаев.
Т.Баймолдаевтың айтуынша, халықты сел мен көшкіннен қорғау үшін мекеме мұздықтарды, өзен-сулар, сел жүретін бассейіндерді үнемі мониторингілеп тұрады. Оның айтуынша, мұздықтардың кенет ери бастағанына байланысты, Ақсай, Аюсай, Үлкен Алматы өзендерінде үш бөгет салып, Тұйық су бөгетінің сыйымдылығын арттыру жоспарланып отыр.
«Үш бөгеттің жоспары құрылып жатыр, 2017 жылдың бірінші тоқсанына дейін жоспарлау жұмыстарын аяқтауымыз керек. Үш бөгетке шамамен 17 млн теңге қаржы беріледі. Осы үш бөгетті жоспарлау жұмыстарына 160 миллион теңге бөлінді», – деп хабарлады Т.Баймолдаев.
Сондай-ақ, Д.Назарбаева бастаған сенаторларға теңіз сулары мен тау өзендерінің көлемін автоматты түрде мониторингтен өткізетін стансаның жобасы таныстырылды. ҚР Ішкі істер вице-министрі Юрий Ильиннің айтуынша, министрлік пен Алматы бұл жобаға қызығып отыр.
«Ендеше, сіздерге сәттілік тілеймін. Бастысы – пайдалы жоба болсын», – деді Д.Назарбаева.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе