“Almaty Towers” бизнес кешеніндегі өрттен қаза тапқан студенттерге әлеуметтік өтемақы төленді. Сонымен қатар олардың денесін туған жерлеріне – Алматы және Оңтүстік Қазақстан облыстарына жеткізуге көмек көрсетілмек.
“Almaty Towers” ғимараты өртенген кезде мерт болған студенттердің отбасының әрқайсысына әл-Фараби атындағы Қазақ ұлттық университеті 340 мың теңгеден әлеуметтік көмек ақша берді„ деп хабарлады осы университеттің БАҚ және қоғаммен байланыс басқармасындағылар.
– Қаламызда орын алған қайғылы оқиға кезінде біздің 2 студент мерт болды. Біреуі Сартбаев Нұрлыбек — Физика-техника факультетінің ІІІ-курс студенті, екіншісі — Айдаралиев Еламан, “Ядролық физика” мамандығының ІІІ-курс студенті,
– деді олар.
Сонымен қатар университет және кәсіподақ қаза болған студенттердің денесін туған жерлеріне – Алматы және Оңтүстік Қазақстан облыстарына жеткізуге көмектеседі.
Бұдан тыс университеттегі студенттер де материалдық көмекке жылу жинап жатыр екен.
Еске сала кетелік, “Almaty Towers” бизнес кешені 6-қараша өртенді. Ол күні бір адамның денесі табылған. Ал кейіннен 5 адамның мүрдесі өрт болған күннің ертеңінде, 7-қарашада оқиға орнын жинау, тазалау кезінде 11.00-де табылған. Олар алматылық бірқатар ЖОО-ларда білім алып жатқан 1994, 1995, 1996 жылы туылған студент жастар болып шықты деп хабарланып еді.