Өрт кезінде екі адам құтқарылып, біреуі жедел жәрдем ауруханасына жатқызылды.
Алматы қаласындағы тұрғын үйлердің біріндегі пәтерде өрт шығып, өрт сөндірушілер оқиға орнынан әйел адамның жансыз денесін алып шықты, деп хабарлады қалалық ТЖД баспасөз хатшысы Сандуғаш Баймұхамбетова.
“Өртті сөндіру және құтқарушылар тобының барлауы кезінде жуынатын бөлмеде 1966 жылы туылған пәтер иесінің бас жарақатын алған жансыз денесі табылды. 20 адам қауіпсіз жерге көшірілді, олардың бесеуі – бала”, — деп хабарлады Баймұхамбетова.
Оның айтуынша, сатының көмегімен отпен күресушілер зардап шеккен екі адамды құтқарып қалған. Олардың бірі – 1983 жылы туылған азамат ауруханаға жатқызылды. Қабылданған шаралармен өрт 06:19-да ауыздықталып, 06.19-да жойылған. Өрт ауданы 35 шаршы метрді құрады. Өрт себептері анықталуда.