Алматы облысында төрт күн бойына тауда адасып жүрген ресейлік екі турист құтқарылды. Бұл туралы Алматы облыстық Төтенше жағдайлар департаменті хабарлайды.
Ресейден келген саяхатшылардың жалпы құрамында 11 адам болған. Олар Көксу өзенінің арнасымен жүріп, Сатылы асуына көтерілуді мақсат еткен. Солардың ішінен: бірі жиырмадан, екіншісі қырықтан асқан екі әйел адасып кетіп, төрт күн бойы дәм татпай, тау ішін паналап жүрген.
6 мамыр күні жоғалған туристер жөнінде хабар облыстық Төтенше жағдайлар Департаментіне тек 10 мамыр күні түнгі сағат 22:40та келіп түскен.
«Екі туристті іздеу үшін Талдықорған жедел құтқару жасағының жеке құрамы, Төтенше жағдайлар бөлімдерінің қызметкерлері, 2091 әскери бөлімінің қызметкерлері шықты. Барлығы 49 адам мен 7 техника, сонымен қатар «Қазавиаспас» АҚ тікұшағы жұмылдырылды», – деп хабарлады облыстық ТЖД.
11 мамырда туристер табылып, тікұшақпен қауіпсіз жерге жеткізілді.