Ақышевтың не дегенін естідіңіз бе?

Қазақстандықтар біртіндеп доллардан ұлттық валютаға ауысып келеді. ҚР Ұлттық банкінің төрағасы Данияр Ақышев осылай мәлім етті.

«Халықтың теңгеге деген сенімі күшейіп келеді. Мәселен, қаңтар-ақпан айларында теңгемен сақталатын депозиттердің жалпы көлемі 0,3 пайызға өсті. Ал шетелдік валютаның депозиттері 11,5 пайызға азайды», – деді Ақышев Үкіметтің бүгінгі отырысында. Оның сөзіне қарағанда, заңды тұлғалардың шетел валютасымен сақтап отырған депозиттері 45,8 пайызға дейін төмендесе, жеке тұлғалардың валюталық депозиттері 58,8 пайызға дейін түсті. «Ал ел экономикасын несиелендіру мәселесіне келер болсақ, биыл қаңтар-ақпан айларында өткен жылдың аталған кезеңімен салыстырғанда, берілген несиелердің көлемі 7,9 пайызға ұлғайды. Осы орайда заңды тұлғалар үшін теңгемен берілген несие ставкасының 14,3 пайызға төмендегенін атап өткен жөн. Бұл – 2015 жылдың тамызынан бергі ең төменгі ставка», – деп атап көрсетті бас банкир.