Ақтөбеде жас келіншек туа салысымен баласын 60 мың теңгеге сатып жіберді

Осылайша ол Данагүл Өтешова есімді танысына хабарласып, баласы жетімдер үйінде емес, толық отбасында өсуі үшін өзге адамдардың қолына бергісі келіпті. Тіпті баладан бас тартатынын нотариус арқылы реттеп те қойған. Нәрестенің жаңа иесінің берген 60 мың теңгесін танысы Данагүл екеуі тең бөліп алады. Кейін ойынан айнып, қайтадан баланы алмақшы болып, полицияға арызданады. Ал прокурор болса, бұл үш адамның өзара келіскенін айтып отыр.

“Жанна Ақаласова 2017 жылдың 16 қаңтарында босанды. Перзентханада жатқан кезде ол Дина Досақовадан хат алып тұрған. Ол перзентханадан 18 қаңтар күні шығып, сол жерге келіп тұрған Д.Досақоваға баланы ұстатады. Кешкілік Ақаласоваға баладан бас тарту туралы қолхат беріп, ақшаны алды»,- деді прокурор.

Ал Дина Досақова болса, олардың арасында ақша туралы келісім мүлде болмады дейді. 60 мың теңгені тек алғыс ретінде беріпті.

“Жасым осыншаға келгенде мұндай қиындыққа тап боламын деп ойламадым. Қазақтың баласы жетім өспесін деп бауырымызға басқымыз келді”, – дейді Досақова.

Ал екі ортада сенделген сәби қазір “Үміт” сәбилер үйінде. Үш айлық баланың денсаулығы жақсы. Ал айыптаушылардың кінәсі толық дәлелденетін болса, онда 7-10 жыл көлемінде бас бостандықтарынан айырылуы мүмкін.