Ақмола облысының Целиноград ауданында 61 жастағы ер адамның мүрдесіне қатысы тексеру жұмыстары жүргізіліп жатыр.
Бұл туралы облыстық ІІД баспасөз қызметі хабарлады.
2018 жылдың 11 қаңтарында Целиноград ауданының ІІБ кезекшілік бөліміне Р.Қошқарбаев ауылынан 500 метр қашықтықта жергілікті 1957 жылы туған ер адамның мүрдесі жатқаны туралы ақпарат түскен.
Ер адам 2018 жылдың 11-қаңтарында таңғы сағат 08:00-дер шамасында үйінен шығып қайтып оралмаған. Алайда бірер сағат өткен соң, оның жансыз денесі табылды.
Жүргізілген тексеру кезінде оның денесінде күш қолданудың белгілері байқалмады. Есесіне 2013 жəне 2015 жылдары екі рет инсульт алғаны анықталды. Сондай-ақ, ол ІІІ-топтағы мүгедек екен.
Сот-медициналық сараптаманың қорытындысы бойынша анықталғандай, ер адам суықта үсіп қалған. Ал туыстарының арызы бойынша ер адамды қатты боран болып тұрғанда жұмысқа шақырған көрінеді.
Қазіргі уақытта полиция қызметкерлері осыған байланысты тексеріс жүргізіп жатыр.