Ақмола облысында туған бөлесін өлтіргендер сотталды

“Қапаров Айбол ҚР-сы Қылмыстық Кодексінің 99-шы бабының 3-ші тармағына  сәйкес қасақана кісі өлтіргені дәлелденіп, сот оны 15 жылға бас бостандығынан айыруға үкім кесті”, деді судья.

Асаба жігітті өлтірді деп айыпталған Айбол Қапаров жазасын қауіпсіздігі жоғары түзету мекемесінде өтейтін болады. Оның туған інісі Айбек Қапаровтың бір жылға бас бостандығынан айырылып, қолына сотта кісен салынды. Бұл ағайынды екеу олардың қолынан мерт болған Абылай Шыңғысовтың туған бөлелері екен. Түнделетіп келіп, марқұмның үйінде ойран салғандардың арасында тағы ауылдас 3 жігіт болған. Олардың әрқайсысына 1 жылға шартты түрде  үкім кесілді.

Естеріңізге сала кетейік, оқиға өткен жылдың желтоқсан айында Красивое ауылында болған-ды. Оқиғаға өзі куәгер болған ана соттың мұндай шешімімен мүлдем келіспеймін деп отыр.

“Бәрі де бостандықта жүрді. Ешкім де ештеңе істеген жоқ. Бәрі бірге келген. Бірге өлтірді. Мен куәмін. Кішкентай баланың көзінше, жылаған сықтағанына қараған жоқ олар. Ешқандай аяушылық болған жоқ. Ары қарай жазам”, деді марқұмның анасы.