Шоу бизнес әлемінен алшақтап кеткен Зарина Омарова күні кеше отбасылық өмірге аяқ басқанына 10 жыл толуына орай дастархан жайып, той жасады. Ет жақындары мен достары жиналған бұл кеште отандық жұлдыздардың бірі де болмады. Ал Зарина болса, өнерге қайта оралғанда санаулы досы ғана оны құшақ жая қарсы алғанын айтты.
«Көзден кетсе, көңілден де кетеді…» деген сөзді Зарина Омарова растады. Он жыл уақытын жанұясына арнаған әнші бүгінде сахнаға қайта оралғанымен, оны құшақ жая қарсы алған әріптестерінің аз болғанын айтады.
Бүгінгі тойда қуаныш иесінің қонақтарға жайылған ақ дастарханында өнердегі бірде-бір әріптесі бой көрсетпеді.
Соңғы он жылын бала тәрбиесіне арнаған Зарина, шығармашылықты қайта бастаудың оңайға соқпағанын жасырмайды. Әнші сахнаға оралғанда оны санаулы ғана құрбылары құшақ жая қарсы алған.
“Мәдина, Дильназ… Адам өзгереді ғой енді жыл өте, басқа өте. Әрине қиын, оңай емес. Негізі қайтадан сахнаға шығу оңай емес. Енді оның бәріне адамның өзінің күш-қуаты керек”, – дейді әнші.
Зарина шоу бизнес көшіне ілесу қажеттігін жақсы ұғады. Өнер бәйгесінде өгейдің күйін кешкен әнші, өзін жатырқай бастаған әріптестерін түсіне алмай отыр.
“Енді қазіргі уақытта ешкім еш нәрсені көрсете бермейді негізі. Не болса да адамның ішінде ғой бәрі. Бірақ, енді бәрі күле қарайды. Мен өзім де олардың орынында болсам өз-өзімді қалай ұстайтынымды білмес едім”, – деп ағынан жарылды Зарина.
Әріптестеріне деген өкпе-назы болса да, Заринаның бұл кешті көңілсіз өткізуге хақысы жоқ. Өйткені, дәл осы күні бұл отбасылық одаққа 10 жыл толды.
Әншінің айтуынша, қазіргі жарымен ол мейрамханалардың біріндегі жазғы алаңда танысқан. Міне, содан бері ғашықтардың әлі күнге дейін жұбы жазылмай келеді.
Дереккөз: nur.kz