Сирия-түрік шекарасы аумағындағы “Ислам мемлекеті” экстремистік тобының бекіністерін америкалық ұшақтар бомбалай бастады.
Бұның алдында түрік әскерінің танктері мен авиациясы сирия шекарасын кесіп өтіп, сириялық қарулы оппозиция күштерімен бірге ИМ содырларын ығыстыруға талпынды.
Сәрсенбі күні Түркия СІМ басшысы Мевлют Чавушоглу Сириялық демократиялық күштер құрамында соғысушы күрдтерді Евфраттың оң жағалауына ығысуға шақырды. Жақында сириялық күрдтер оң жағалаудағы Манбидж қаласын басып алған еді. Осы ұсынысты Анкараға сапармен барған АҚШ вице-президенті Джо Байден де қолдады.
Байденмен келіссөздерден соң, түрік премьер-министрі Банали Йылдырим Сирияда қандайда бір күрд аумағының пайда болуына “жол жоқ” деп мәлімдеді.