АҚШ мемлекеттік хатшысының Оңтүстік және Орталық Азия мәселелері жөніндегі көмекшісі Нишу Бисвал Өзбекстан президенті Шавкат Мирзиёевтың жаңа бастамаларын қолдайтынын мәлімдеді.
“Біз ең басынан-ақ, мәселен кейбір саяси тұтқындарды бостандыққа шығаруынан, экономика мен мемлекеттік басқаруды модернизациялау ниетінен үміт күттіретін белгілерді байқадық. Мұндай шаралар тұрақтылықты, қауіпсіздікті, өзбек халқының әл-ауқатын нығайтады деп ойлаймын,” – деді Бисвал “Настоящее времяға” берген сұхбатында.
Бисвал сонымен бірге Орталық Азиядағы адам құқықтарының жағдайына да назар аударып, Түркіменстандағы Азат Еуропа/Азаттық радиосы тілшілерін қуғындауды сынға алды.
“АҚШ Тәжікстан үкіметінен азаматтық қоғам мен саяси партияларға қысымды доғаруды сұрап келеді. Қазақстандағы блогерлерді қамауға алу өте өкінішті жағдай. Қазақстан АҚШ-тың Орталық Азия аймағында лидер ретінде маңызды әріптесі, ол көрші елдерге адам құқықтары мен сөз еркіндігіне кепіл болып, азаматтық қоғамның дамуына үлес қосу арқылы, азаматтардың наразылықтарын айтуға мүмкіндік беретін ел ретінде үлгі болуға тиісті”- деп атап өтеді Бисвал.