Алматыдағы марафонға 60-тан астам елдің желаяқтары қатысады
Биыл 27 қыркүйекте өтетін халықаралық жүгіру додасына 60-тан астам мемлекеттен 16 мың адам қатысады деп жоспарланып отыр. Марафонды Алматы әкімдігінің қолдауымен «Бірінші болу батылдық» корпоративтік қоры ұйымдастырады. Бұл жөнінде қалалық Спорт басқармасының өкілдері мәлімдеді.
Жарысқа әлемнің әр қиырынан спортшылар келеді. Ең шалғай нүктелер қатарында Буэнос-Айрес, Сан-Паулу, Окленд, Сидней, Кейптаун, Ванкувер және Торонто бар. Қазіргі дерекке сәйкес, шетелдік қатысушылардың көбі Ресей, Қырғызстан, Өзбекстан және Қытайдан келеді. Бұдан бөлек, Оңтүстік Корея, АҚШ, Ұлыбритания, Беларусь, Германия, Украина және өзге мемлекеттердің жүгірушілері тіркелген.
Мерейтойлық жарысқа байланысты барлық қашықтықтың бағыты жаңартылған. 42,2 шақырымдық марафон трассасы биыл алғаш рет бір айналымнан тұрады. Жүгірушілер Абай даңғылымен Момышұлы көшесіне дейін жетіп, кері бағытта қозғалады. Одан әрі маршрут Достық даңғылы, Бөгенбай батыр, Қабанбай батыр, Шевченко, Құрманғазы, Наурызбай батыр және Сәтбаев көшелері арқылы өтеді. Жарыс Абай алаңынан басталып, Республика алаңында мәреге жетеді.
Өткен жылы Almaty Marathon-ға 60 мемлекеттен 1 363 шетелдік спортшы қатысқан. Жарыстан кейін жүргізілген сауалнамада олардың 79,3%-ы Алматыға тағы да келуге ниетті екенін білдірген. Almaty Marathon Халықаралық марафондар мен жүгірулер қауымдастығының (AIMS) халықаралық күнтізбесіне енгізілген. Сондай-ақ жарыс түркі халықтарының марафондарын біріктіретін TAN альянсының құрамына кіреді.
Almaty Marathon 2026 аясындағы 42,2 және 21,1 шақырымдық қашықтықтарға қатысу үшін тіркелу марафонның ресми сайтында әлі де жалғасып жатыр.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе