Алматы облысында әкесін ұрып өлтірген ер адам 9 жылға сотталды
Алматы облысында туған әкесін соққыға жығып, өліміне себеп болған ер адамға сот үкімі шықты. Сот мәліметінше, 10 қазан 2024 жылы Райымбек ауданына қарасты Қайнар ауылында айыпталушы мен оның әкесі арасында тұрмыстық кикілжің туындаған. Жанжал кезінде алкогольдік масаң күйде болған ер адам әкесінің басы мен денесіне қолымен де, аяғымен де бірнеше мәрте соққы жасаған.
Сот-медициналық сараптама қорытындысы жәбірленушінің өлімі кеуде тұсының ауыр жарақатынан болғанын көрсетті. Қабырғалардың сынуы мен өкпенің зақымдануы салдарынан травматикалық шок туындап, соңы қайғылы жағдаймен аяқталған. Сарапшылар денеге кемінде 15 соққы тигенін анықтап, бұл жарақаттарды өмірге қауіпті ауыр зиян ретінде бағалаған.
Бұдан бөлек, сотталушыдан сараптама шығындары өндіріліп, жәбірленушілерге өтемақы қорына міндетті төлем жүктелді. Үкім заңды күшіне енді.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе