Сәуірде киік мүйізі сатылымға шығады
Биыл сәуірден бастап Қазақстан киік мүйізін сатуды қайта бастауға ниетті. Мұны Экология және табиғи ресурстар министрі Ерлан Нысанбаев айтты деп хабарлайды 365info.kz сайты Ulysmedia.kz-ке сілтеме жасап.
Министрдің айтуынша, Алматыдағы арнайы қоймада шамамен 20 тонна киік мүйізі жиналған.
«Киік санын реттеу кезінде мүйіздер кесіліп алынады. Олар қабылдау пункттерінде және жергілікті әкімдіктерде ақпараттық жүйеге енгізіліп, арнайы таңбаланады. Кейін күзетпен Алматыға жеткізіледі. Мұнда арнайы салқындатқыш қоймалар бар. Онда белгілі бір температура мен ылғалдылық режимі сақталады. Әр мүйіздің жеке нөмірі бар және бәрі тіркеуде тұр», – деді Ерлан Нысанбаев.
Айта кету керек, киік мүйізі – браконьерлердің басты нысанасына айналған ең құнды ресурс. Осы саладағы тәртіпті күшейту үшін Қазақстан Бонн конвенциясына қосылып, 2016 жылдан бері киік мүйізін сатуға нөлдік квота енгізген еді.
«Нарықта өнім болмаса, оның бағасы жоғары болады. Ал көп көлемде шықса, баға төмендеуі мүмкін. Сондықтан нақты сома туралы айту қиын», – деді министр.
Сонымен бірге, министрлік түскен қаражаттың қайда жұмсалатынын анықтап қойған.
«Бұл қаржы биоалуантүрлілікті сақтауға, киіктерді қорғауға және қажетті техника сатып алуға бағытталады», – деді Нысанбаев.
Бұған дейін Ерлан Нысанбаев киік мүйізінің бағасына қатысты пікір білдіріп, интернетте бір килограмы 2000 долларға дейін сатылатыны туралы мәліметтерді көргенін айтқан. Алайда министр мұндай бағалар шынайы емес болуы мүмкін екенін жеткізген.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе