Елімізде қызылша өршіп тұр: дәрігерлер сақтанудың жолын айтты

Эпидемиологиялық талдау нәтижесі бойынша науқастардың 79% мүлде вакцинацияланбаған, 8,4% екпенің толық курсын алмаған, ал шамамен 10%-ның иммундық мәртебесі белгісіз. Ерекше алаңдатарлығы екпе алмаған балалардың шамамен 59%-ы ата-анасының шешімімен вакцинациядан тыс қалған.

Жыл басынан бері республика бойынша қызылшаның 1 951 жағдайы тіркелді. Науқастар ең көп анықталған өңірлер қатарында Астана қаласы (581 жағдай), Жамбыл облысы (339), Алматы қаласы (317) және Алматы облысы (146) тұр.

Мамандар қызылшаның аса жұқпалы вирустық ауру екенін ескертеді. Вакцинация болмаған жағдайда дерт ауыр өтіп, пневмония, есту қабілетінің төмендеуі, жүйке жүйесінің зақымдануы, энцефалит сияқты қауіпті асқынуларға, тіпті өлімге әкелуі мүмкін. Сонымен қатар, қызылшадан кейін адамның иммундық жүйесі ұзақ уақыт әлсірейді.

Әсіресе, жас балалар, екпе алмаған ересектер, жүкті әйелдер, сондай-ақ созылмалы ауруы бар және иммунитеті төмен адамдар қатер тобында. Жүкті әйелдер үшін қызылша түсік тастауға, мерзімінен бұрын босануға және ауыр асқынуларға соқтыруы ықтимал.

Дәрігерлердің айтуынша, қызылшадан сақтанудың ең тиімді әрі сенімді жолы – вакцинация. Екпе қауіпсіз, жеңіл қабылданады және инфекциядан, оның ауыр салдарынан сенімді қорғайды.