Атырауда пәтерден 21 күн жатқан ер адамның денесі табылды

Атырау қаласындағы Береке ықшамауданы, №24 үйден ер адамның сүйегі табылды деп хабарлайды kaz.365info сайты «Ақ Жайыққа» сілтеме жасап. Алдын ала мәліметке сәйкес, марқұмның пәтерде жатқанынa шамамен 21 күн болған.

Тұрғындардың айтуынша, ер адамның қаза тапқаны туыстары іздеп келген кезде ғана белгілі болған. Осыған дейін подъезде ұзақ уақыт бойы өткір қаңсық иіс тұрған, алайда көршілер нақты не болғанын білмеген.

«Иіс бүкіл подъезді алып кетті. Өз күшімізбен адам жалдап, тазалап, хлор мен «Белизнамен» жудық. Бірақ соған қарамастан иіс кетпей тұр. Мамандар болмаған соң, нақты не қолдану керегін де білмейміз», — дейді көршілердің бірі.

Сүйек табылғаннан кейін тұрғындар өз қаражатына тазалық жұмыстарын жүргізгенімен, иіс әлі күнге дейін сіңіп қалған күйінде қалып отыр. Тұрғындардың сөзінше, оқиғадан кейін санитариялық-эпидемиологиялық қызметтер немесе мамандандырылған ұйымдар келмеген, ресми дезинфекция жасалмаған.