Мақпал Жүнісова ұшаққа домбырамен кіру үшін 59 мың теңге төлеген

Әнші Мақпал Жүнісова әлеуметтік желідегі парақшасында домбырасын бортқа өткізбей қойған FlyArystan әуекомпаниясына шағымданды. Домбырасымен бірге ұшаққа кіру үшін қосымша 59 мың теңге төлем жасаған.

«Аты-жөні жазылмаған. Домбыра деп көрсетпесе де, оны 59 мың теңгеге әрең өткіздік. Мен үшінші рет осындай жағдайға тап болып отырмын», – деді әнші.

FlyArystan әншінің шағымына жауап беріп, музыкалық аспаптарды тасымалдау бойынша ережелер бар екенін түсіндірді. Ережеге сай, аспапты салонға алып өтуге тек қол жүгі ретінде рұқсат беріледі, егер оның салмағы 5 кг аспаса және көлемі 56x23x36 см-ден үлкен болмаса. Басқа жағдайда қосымша орын үшін ақы төлеу қажет.

«Біз барлық өнер иелерінің еңбегін жоғары бағалаймыз және халқымыз үшін қасиетті домбыраның құндылығын түсінеміз. Дегенмен, барлық жолаушыларға тең қарым-қатынас көрсету және ортақ ережелерді сақтау – қауіпсіздікті қамтамасыз етудің кепілі», – делінген FlyArystan хабарламасында.

Айта кетейік, халық артисі бұған дейін де Қостанай мен Қарағандыдағы концертіне ұшар кезде домбырасын қолжүгі ретінде алып кіруге рұқсат ала алмағанын әлеуметтік желіде жазған болатын.