Ұлттық ұлан жауынгері қатаң режимдегі түзету мекемесінен қашпақ болған тұтқынды тоқтатты, деп хабарлайды ҚазАқпарат.
Алайда сарбаздың ескертуіне қашқын құлақ аспаған. Ескерту алаңынан асып, бақылаушылар соқпағына өтіп кеткен. Жауынгер Асхат Медет осы кезде тағы да «Тоқта, артқа қайт» деп, дауыстап белгі береді де, артынша дабылды іске қосады. Тұтқын тоқтамастан қоршауға беттей берген.
Тіпті ішкі бақылау соқпағына аяқ басып үлгерген. Осы кезде сарбаз «Тоқта, атам» деп айқайлап, әуеге оқ атады. Мылтық дауысын естіген қашқын бағытын өзгертіп, басқа қосынға қарай қашады.
«Жасақтың шалт қимылының арқасында тұтқын қоршауға жете бере ұсталды. Қазір ол тәртіптік изоляторда. Оқиғаның мән-жайын құзырлы орган өкілдері анықтайды» -дейді «Ұлттық ұлан «Шығыс» өңірлік қолбасшылығының баспасөз қызметі бастығы Бағдат Амангелді.