Қасымов апатқа ұшыраған пойыздың машинисі ұсталды деген ақпаратты жоққа шығарды
Жамбыл облысында апатқа ұшыраған пойыздың машинисі ұсталған жоқ. Бұл туралы бүгін ішкі істер министрі Қалмұханбет Қасымов мәлімдеді.
Бұған дейін “КТК” телеарнасы Астана-Алматы бағытындағы пойызды басқарған машинистің ұсталғанын хабарлаған еді. БАҚ ақпаратынша, жолаушылар вагоны аударылған учаскеде кезекшілік атқарған теміржол жұмысшыларынан да жауап алынған.
“Оны ұстады деп кім айтты? Бұл жалған ақпарат, одан бар болғаны жауап алынып, кейін босатты. Бұл деген тұтас бір қылмыстық іс, сараптама жүргізіледі”, — деді Қасымов үкімет отырысынан кейін.
Машинистің ұсталмағанын бірінші инвестициялар және даму министрі Роман Скляр де растады.
https://kaz.365info.kz/shu-manynda-apatkha-yshyragan-pojyz-khandaj-zhyldamdykhpen-zhyrgeni-belgili-boldy-320273
“Жоқ, ешкімді ұстаған жоқ. Тергеу объективті, ашық түрде жүргізіледі”, — деп сендірді Скляр.
Еске салып өтсек, 17 маусымда сағат 13.25-те Жамбыл облысының Шу ауданында Астана-Алматы бағытындағы жолаушылар пойызының 8 вагоны рельстен шығып кетті. Пойызда барлығы 829 жолаушы болған, төтенше жағдай салдарынан бір бала қаза тапты. 25 адам медициналық көмекке жүгінген.
Дерек көз:Sputnik.kz.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе