Шығыстағы Шемонайха ауданын су басып жатыр (фото)
Шығыс Қазақстан облысындағы Шемонаиха ауданының Жоғарғы-Үбе ауылында апаттық-құтқару қызметі тағы бір топ адамды қауіпсіз жерге көшірді.
Бұл туралы ҚР ІІМ Төтенше жағдайлар комитетінің баспасөз қызметі хабарлады. Су басқан ауданға көмекке Алматы облысының төтеншеліктері де келіп жетіп, қосымша күш беруде.
«Су басқан үйлерден 65 адам эвакуацияланды, олардың ішінде 13 бала бар. Зардап шеккендер туыстарының үйлеріне уақытша орналастырылды. Таңертең адамдардың басым бөлігі өз баспаналарына қайта оралды», – деп жазылған хабарламада.
Қызыл судың басуына толассыз жаңбыр мен жер тоңының қалың болуы әсер еткен. Тау суының құйылуына байланысты Лосиха, Маралиха, Козлушка өзендері арналарынан тасыған. Үбе өзенінде сеңнің кептеліп қалуы да жағдайды қиындата түскен. Мұз кесектерін жүргізу үшін 720 келі жарылғыш заттар қолданылып, алдын ала жару жұмыстары жүргізілді.
Қызыл судан ең көп зардап шеккен – Жоғарғы-Үбе және Выдриха ауылдары. Мұнда он шақты үйді су басты. Убинка, Первомайск, Ново-Ильинка, Рулиха, Октябрь ауылдарында бірнеше аулаға су кіріп кетті. Қазір қардың суын сорып, құмқап төсеу жұмыстары жүргізіліп жатыр.
Еске сала кетелік, екі бұрын Шемонайха ауданында табиғаттың оғаш мінез көрсетуіне байланысты төтенше жағдай жарияланған болатын.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе