“700 мың теңге алам…”. Депутат Дүйсенбиев ағынан жарылды

23 қазан 2017, 15:52

376

Жоқ, шынымен. Депутат Берік Дүйсенбиев ағынан жарылыпты. Аbai.kz сайтына берген сұхбатында халық қалаулысы депутаттардың жұмысы қаншалықты ауыр екенін тілге тиек етіпті.

Сөздің ашығына көшейін

БАҚ өкілдері, журналистер, мына сіздер, қоғамдық ортада депутаттардың жағымсыз образын қалыптастырғансыздар.

Сіздердің залдан шығып келе жатқан депутаттан бір-екі минуттық алған сұхбаттарыңызбен депутаттың жұмысы бітпейді.

Оның жұмыс топтарында істейтін жұмысы көбіне көрінбей қалады. Мысалы, біз осы қазан айының жиырма бесі күні таныстырылатын әкімшілік құқықбұзушылық Кодексін әзірлеудеміз. Ал, ол туралы «кім, немен, қалай айналысып жатыр деп» БАҚ өкілдерінің бірде бірі бізден сұраған емес. Ал, біз оған күндіз-түні дайындалудамыз. Елдің ойынша біз, депутаттар, есінеп қойып үйелеп үйде жатқан жалқаулармыз, ал біз жұмыстамыз. Біздің комитет түнгі тоғыз-онға дейін жұмыс істейді.

Депутат таңертең ерте жұмысқа келгеннен кешкі тоғыз-онға дейін жұмыстан бас алмайды.

Депутаттың бір күндік жұмыс кестесі сол күнгі жұмыстың ауқымына байланысты. Мысалы, бүгін күмәнді он екі сұрақ туындап тұр. Сол сұрақтың төңірегінде, міне, комитет жұмыс істеп жатыр.

Қазір – депутатпын

Басқаларады білмеймін, мен өз ісіме барынша жауапкершілікпен қараймын. Қай қашанда білдірілген сенімді ақтауға тырысамын. Кейбіреулер айтып жатады: бір депутат ештеңе өзгерте алмайды. Заң қалай қабылдануы керек болса, бәрібір солай болады деп. Мен осыған қарсы уәж ретінде бір мысал айтайын. Мына Шығыс Қазақстанда екі көрші ауыл бар. Бірі Екатериновка деген немістер тұратын ауыл, енді бірі Жанұзақ деген қазақ ауылы.

Сол Екатериновка ауылының көшелері тап-таза, жол салынған, көшелерінде шам жанып тұрады, құдығы дұрыс, адамдары тоқ, малы семіз. Неге десеңіз, ол ауылдың тұрғындары кішкентай бір мәселе туындай қалса, билікке барып, шағымданып, тұрғындардың барлығы бірауыздан қажетті дүниесін талап етеді. Бұрын солай істейтін, қазір де сол.

Сосын билік ол ауылдың барлық мәселесін шешіп беріп отыратын.

Ал, қазақ ауылы «ауруын жасырған өледі» демекші, қандай проблема болса да, бәрі бір ештеңе өзгермейді деп отыра беретін.

Мына жерде де солай. Мүмкіндікті пайдаланып, қолдан келгенше тырысу керек. Ол бір глобальный мәселелерді шешу емес. Кез келген заңдағы бір норманы дұрыс жұмыс істейтіндей ғып жазып берсек, сол біздің ортақ игілікке қосқан үлесіміз болып табылады. Заңдарымыздың бір-біріне қарама-қайшы тұстары көп. Бізден шығып жатқан заң халыққа қолайлы, түсінікті болуы керек қой. Ал, енді халықтың көзіне көріну-көрінбеу ол әркімнің жеке шаруасы.

Бірақ көпшіліктің көзінше суырыла сөйлегенімен, нақты іске салғырт әріптестерім де бар.

Бірақ бізде өкінішке қарай, депутаттың бет-беделін елді аузына қаратып, бір-екі ауыз сөз айтқанымен бағалайды. Ал, бұл дұрыс емес.

Бізден де ауыр еңбек етіп жатқандар бар

Соларды ойлау керек.Олар Алланың бергенін қанағат тұтып, бала-шағаларын асырап отыр ғой. Оның қасында біздің еңбекақымыз, шүкіршілік.

Қазақта «бұдан да жаман күнімізде тойға барғанбыз» дейтін сөз бар.

Шыны керек, біздің жастық шағымыз, мамандық таңдап, оқу оқыған кездер қиын бір кезеңге тап келді. Сол қиындықты да кешіп өттік. Сондықтан бүгін депутат болдым екен деп, «еркелей» беруге болмайды. Бәрі уақытша: өле өлгенінше ешкім депутат болып жүре алмайды, көптің кебін киесің … Өз басым депутаттың жалақысын тағы да көтеру керек деген ойдан аулақпын.

Қазіргі еңбекақым жеті жүз мың теңге шамасында. Парламентке ақша таба қояйын деп келген жоқпын.

Сондықтан, ол мәселе мен үшін соншалықты маңызды дей алмаймын.

Жылдың басында наурыз айында көтерілген жалақы туралы ғой әңгіме. Депуатттарды бір-бірден ұстап алып, журналистер тергеп, қаншаға көтерілді еңбекақыңыз деп алқымнан ала сұрақтар қойып, бір «аласапыран» болған. Бұл жерде тек депутаттардың жалақысы көтерілді деп даурығу дұрыс емес.

Салыстармалы түрде алсақ, депутаттың жалақысы «Самұрық-Қазынаның» ортаңқол бір басқарушысының жарты айлығына да жетпейді.

P.S. Қазақстанда 1 наурыздан бастап Парламент депутаттарының жалақысы 30-50 пайызға көтерілді. Қазір олардың жалақысы орта есеппен айына 700- 800 мың теңге. Бүгінгі бағаммен есептегенде бұл — 2400 доллар шамасында. ТМД елдерінің ішінде депутаттардың жалақысынан көш бастайтындар Ресей, Қазақстан, Грузия және Украина. Олар, сәйкесінше, 6852, 2445, 1520, 1500 АҚШ долларына тең жалақы алады.